Denboraren lorratzak
Harrizko murruaren gris iluna kolorez argitzen du egurrezko ate berdeak Loiolan. Ez da sartu-irten askoren pasabide diren horietako bat, tarteka baino irekitzen ez duten horietakoa baizik, irekitzen badute. Aspaldian zaintza handirik ez duela jaso antzematen zaio, berdea kolorgetuta eta barren aldea hezetasunarekin ustelduta.
Gardena
Egurrezko hezurdura xumea eta burdin sarea, baratzerako eta atzeko etxola sendoagorako sarrera, bi aldeetara hedatzen den burdin sarearen erdian. Gordetzeko zerbait bai, baina ezkutatzeko ezer ez du parrokia atzean Txaribarko Errebala eta Soreasu auzoa lotzen dituen bidean dagoen ate honek.
Utzitakoa bizirik
Urolako Tren zaharraren Loiolako geltokia izandakoaren ateetan eta leihoetan ere agerikoak dira denboraren lorratzak. Hortzak falta dituen ahoa dirudite atearen goiko aldeko kristaletako hutsuneek, eta keinua botatzen ari dela dirudi leihoak. Utzitakoaren zantzuen artean, ordea, bizi zantzuak erakusten ditu atearen kontra bermatutako bizikletak.
Bizi direnak
Leiho atzeetan bizi direnen eta bizirik dirauten leihoen seinale dira sarri esekitako arropak. Madalenako etxe honetan lehorrak aireztatzera atera dituzte batzuek, eta garbitu berriak eguzkitan lehortzera besteek.
Itsu eta mutu
Loiolako baserri bateko pareta zati honetan, bi leiho ziren tokian bakarra gelditzen da bere horretan. Behekoa erabat itsu eta mutu utzi zuten, paretarekin bat eginez, behin izan zenaren orbanak han dirauen arren. Goikoak eutsi egiten dio, lausotutako begi bakarraren pare bada ere.
Begiak horma irudira
Zaharkitutako eta utzitako industria eraikin horietako bat, Landetan. Itxuraz aspaldi ireki gabeko atea eta bi leiho; eskuinekoak ez bezala, ezkerrekoak kristal guztiak osorik mantentzen ditu burdinezko babesaren atzean. Ate-leiho goibeletara baino, gisa bereko pareta zipriztintzen duten margo eta zirriborroetara jotzen du begiak.
Norako?
Santutxorako eskaileretan gora, metalezko baranda eteten du erdibidean zurezko atexka honek. Argazkian ageri den gisan, ateak apaingarri bitxia dirudi, baina badu beste eginkizunik, baratze bateko sarrera baita.
Berriena
Olazko Andre Mariaren plaza eta Etxe Alai lotzen dituena da Azpeitian kalean jarri zuten lehen igogailua, eta bilduma honetako aterik berriena ere bada igogailu horrena. Metalezko eta kristalezko egiturarako sarrera dotore ageri da argazkian zuhaitzez eta zuhaixkez inguratuta.