Herri Hezitzaileen filosofiaren baitan, Azpeitian zeuden egitasmoez hausnartzeko eta berriak abian jartzeko, 2018an hainbat arlotako eragileekin elkarlanean diagnos-tiko bat egin zuen udalak. "Prozesu hartan identifikatutako erronkak ardatz hartuta egin dira azken urteotako lanketak eta aurrerapausoak. Lau urteren ondoren, ordea, herriko ikastetxeek, udalak, hezkuntza ez formaleko eragileek eta herrigintzakoek elkarlanean garatzen duten herri hezitzailearen egitasmoak fase berri bati ekiteko nahia eta beharra zuela antzeman zen, eta urtarriletik martxora artean, diagnostikoa eguneratzeko lanean jardun dute eragileek", azaldu du Leire Goenaga Hezkuntza batzordeburuak.
Aurretik egindako diagnosia berreskuratzeko eta errepasatzeko, eta arloka diagnosia eguneratzeko hiru saio egin dituzte. Saio horietan hogei eragilek baino gehiagok parte hartu dute, eta urrera begirako lanketarako hiru erronka lehenetsi dituzte: bata da harrera protokolo komunitarioa adostea eta osatzea herrira etorri berrientzat. Bigarrena da umeak bakarrik herrian modu autonomoan ibiltzeko baldintzak sortzea. Eta hirugarren erronka parte hartze elkarguneen lotura eta elkarlana sustatzea da.
Hezkuntza zinegotziaren arabera, diagnosiaren azkenengo eguneraketan "ikuspegia herrian" jarri dute: "Herri hau denok hezten dugu, etxean, kalean edota lantokian". Maite Azpiazu Azpeitiko Herri Hezitzaile lantaldeko kideak eta Oinherriko kideak, berriz, eragileen begiradan jarri du arreta: "Bakoitzak eragile baten ordezkari gisa parte hartu du egin ditugun saioetan, eta interesgarria izan da begirada zabaltzea eta erronkak herri gisa zehaztea".
Oinherriko bazkide laguntzaile
Azpeitiko Udalak Oinherriren bazkide laguntzaile izatea onartu berri du; aho batez hartu zuten erabakia udal ordezkariek azken udalbatzarrean, apirilekoan. Udalaren eta Oinherriren orain arteko elkarlana urtez urteko hitzarmenen bidez egin dute, baina hemendik aurrera Oinherri herri hezitzaile sareko bazkide laguntzailea izango da Azpeitiko Udala. Horretarako, 4.000 euroko ekarpena egingo du udalak.