Joanes Antxieta musikari urrestildarra hil zela 500 urte bete dira aurten, eta haren lana ezagutzera emateko hainbat ekitaldi antolatu dituzte urtea bukatu bitarterako. Ekitaldi horien barruan, atzo, ostirala, Joanes Antxietari buruzko hitzaldia eta mahai inguruan eskaini zuten Basazabal jauregian, eta hainbat herritar bertaratu zen Antxieta nor izan zen, zer egin zuen eta utzi zuen ondarea ezagutzera. Azpeitiko Udalak, Eresbil musikaren euskal artxiboak, Donostiako Musika Hamabostaldiak eta musika gustuko duen herritar talde batek antolatu dituzte 500. urteurrenaren bueltako ekitaldiak, elkarlanean.
Atzoko hitzaldian, Ion Bagues Eresbileko zuzendari ohi eta euskal ondarearen adituak Antxietaren biografiaren zertzeladak eman zituen; Pello Leiñena Eresbileko zuzendariak, berriz, Antxietari eskainita sortu berri duten webgunea aurkeztu zuen, eta Iñigo Alberdi Bilboko Koral elkarteko zuzendariak azaldu zuen gaur egun nola kudea daitekeen Antxietaren ondarea. Ignacio Arakistain aritu zen gidari. Arakistainek esana da mendeurrenak balio izan diola Antxietaren biografia ezagutzeko, "betidanik" izan baitu haren bizitzan sakontzeko grina. Bide horretan, Routledge Erresuma Batuko argitaletxeak Antxietari buruz kaleratu berri duen liburua aipatu du: The Music of Juan Anchieta (Juan Antxietaren musika). "Oso lan mamitsua eta interesgarria da. Datu biografikoak emateaz gain, haren musikaren azterketa egiten du. Aldundiaren laguntzarekin, euskarara eta gaztelaniara itzultzeko lanetan dabiltza, urteurrenaren harira".
Gainerako ekintzak
500. urtemuga oroitzeko antolatutako ekintzen barruan, Urrestillako San Joan jaietan, Joanes Antxietaren omenezko plaka bat jarri zuten Urrestillako plazan. Abuztuaren 18an, berriz, Antxietari buruzko kontzertua eskaini zuten Donostiako Musika Hamabostaldiarekin batera, Urrestillako elizan. Bihar, ostiralez, jarraituko dute antolatutako ekintzekin, eta azaroan zein abenduan ere izango da ekitaldirik. Besteak beste, azaroaren 18an V. mendeurren kontzertua (1523-2023) eskainiko dute Frantziskanetan, eta abenduaren 16an Joanes Antxietaren Sine nomine kontzertua emango dute 19:30ean, Soreasu Sebastian Donearen parrokian. Horiez gain, oraindik data zehatzik ez duen ekitaldi instituzionala ere egitekoak dira.
Hona hemen ekitaldien xehetasunak:
- Urriak 27: Joanes Antxietari buruzko hitzaldia eta mahai ingurua. 18:30ean, Basazabal jauregian. Pello Leiñena Eresebilen zuzendaria eta Ion Bagues zuzendari ohia; Iñigo Alberdi Bilboko Koral elkarteko zuzendaria; eta Ignacio Arakistain musikari eta ikertzailea.
- Azaroak 18: V. mendeurren kontzertua (1523-2023): Joanes Antxieta, Francisco de Peñalosa eta Juan de Urrede. 19:00etan, Frantziskanetako elizan. Parte hartzaileak: Vandalia ahotsak; Bilboko Koral lkarteko Euskeria Korua; Azpeitiko Julian Barrenetxea abesbatza; Azketa eta Parrokiko abesbatzak. Zuzendaria: Urko Sangroniz.
- Abenduak 16: Joanes Antxietaren sine nomine kontzertua. 19:30ean, Soreasu Sebastian Donearen parrokian, Antxieta ahots taldearen eskutik. Tipleak: Maider Biguri, Lucia Gomez, Isabel Lacar. Altoak: David Azurza, Larraitz Gorriño, Mario Hernandez. Tenoreak: Xabier Barriola, Iñigo Vilas, Jon Zaldua. Baxuak: Xabier Sarasola, Miguel Angel Segarra, Ander Simal. Organista: Loreto Fdez. Imaz. Zuzendaria: Oscar Rodriguez.
- Joanes Antxietaren omenezko ekitaldi instituzionala. Antxieta etxean plaka jarriko dute, kanta batzuk joko dituzte eta hitz batzuk egingo dituzte. Antxieta etxearen aurrean izango da, baina oraindik ez dituzte eguna eta ordua erabaki.