Gipuzkoako Eskolarteko Bertso Txapelketaren kanporaketak Errezilen, Aretxabaletan, Amasan eta Aizarnazabalen jokatu zituzten, eta bihar izango da finala Azpeitiko Azoka Plazako Elikagunean, 20:00etan hasita. Kanporaketak bezala, finaleko saioa ere afari bueltan egingo dute. Zortzi bertsolari gazte ariko dira finalean, eta horietatik hiru Urola Kosta eskualdekoak dira: Erniarraitz bertsozale elkarteko Joanes Azpillaga (Azpeitia, 2007) eta Suhar Gesalaga (Azpeitia, 2007) eta Motxian-Etxebeltz bertsoguneko Adei Urbitarte (Zarautz, 2008). Horiez gain, Kattalin Arabolaza, Egiar Otegi, Sustrai Goenaga, Maddi Lasa eta Danel Etxeberria bertsolariek kantatuko dute. Biharko saioko txapelduna eta txapeldunordea Euskal Herriko finalera sailkatuko dira. Saio hori ekainaren 14an izango da, 16:30ean, Arantzan (Nafarroa).
Aretxabaletako kanporaketan aritu zen Azpillaga, Gesalaga Amasakoan eta Urbitarte Aizarnazabalgoan. Kanporaketan egindako saioarekin ez zen oso gustura geratu Azpillaga, bere egunik onena ez zuela izan gogoratu du, baina gustura dago finala jokatzeko aukera eskuratu zuelako. Gesalaga, Amasako kanporaketa irabazita, zuzenean sailkatu zen finalera, baina ordukoan baino "bertso jardun hobea" egin nahi du gaurko saioan. Urbitarte berak espero baino hobeto aritu zen Aizarnazabalen, eta zuzenean sailkatu zen finalera.
Zarauztarra eskubaloi jokalaria ere bada, eta jubeniletako Euskadiko Txapelketako lauko finalaren bezperan izan zuen kanporaketako saioa. "Aurreko bi ikasturteetan utzita izan nuen bertso eskola, denborarik ez neukalako. Aurtengo ikasturtean berriro hasi naiz bat-bateko bertso eskolan. Eskolartekoan parte hartzeko bertso eskolakoek konbentzitu ninduten. Kanporaketako saiora eskubaloiko entrenamendutik presaka joan nintzen, baina esperientzia polita izan zen".
Mahai bueltako saioak
Azpillagak iaz Gipuzkoako eta Euskal Herriko Eskolarteko finalak jokatu zituen. Beste bi bertsolariak, baina, bihar estreinatuko dira Eskolarteko Gipuzkoako finalean. Hirurak pozik daude finalera sailkatu direlako, eta gogotsu daude bertsotarako. Urbitartek dio, eskubaloiko txapelketa tarteko, denbora asko ez duela izan finalerako prestatzeko, baina bere buruarekin gustura gelditzeko lain egiten badu konformatuko dela. "Saiatu naiz aitarekin edota lagunen batekin gelditzen pixka bat bertsotan jarduteko, baina eskubaloiko lauko fasearekin ez dut denbora askorik eduki", aitortu du zarauztarrak.
Afari bueltan egiten dituzte Eskolarteko saioak, eta horrek bere alde onak eta txarrak ditu Azpillagaren eta Gesalagaren ustez. "Gertuagoko saioak dira. Besteekin batera afaltzen duzu, lagunekin egoten zara eta saioaren aurreko momentua polita izaten da. Bestalde, jendea oso gertu izaten da, eta ez da gauza bera eserita edota tente kantatzea. Gu erosoago sentitzeko saiakera bat da, eta hori eskertzekoa da, baina aukeran nik neuk tente kantatzea nahiago dut", azaldu du Azpillagak. Gesalagaren arabera, jendaurrean estreinatzen diren bertsolariei "presioa kentzeko" modu bat da saioa afari bueltan egitea: "Azkenean, mahai bueltan lagun giro handiagoa dago; tente dena urruti bezala ikusten da. Dena den, bere alde txarrak ere eduki ditzake afari bueltan aritzeak".
Urbitartek dio "esperientzia ona" iruditu zitzaiola afari bueltan bertsotan egitea, eta "jendea ezagutzeko" balio izan ziola. Bihar finalean etxean ariko dira bi azpeitiarrak, eta horrek ere onetik eta txarretik du haien arabera. "Presio estra bat" da, alde batetik. Beste aldetik, baina, lagunen, etxekoen eta bertso eskolakoen babesa izango dute, eta hori lagungarri izango dutelakoan daude Erniarraitzeko biak. Herrian kantatzeak "ilusioa" ere egiten die. Bi horiek baino etxetik urrutiago kantatuko du Urbitartek bihar, baina poz-pozik joango da finaleko saiora: "Eskolarteko txapelketan kantatzea bakarrik erronka zen niretzako; finalean aritzea izugarria da".