Euskal abertzaletasunaren historian adierazgarriak izan diren bost lagun ezagutarazteko helburuarekin Abertzaleak izeneko hitzaldi zikloa antolatu du Naziogintza taldeak. Zikloko bosgarre eta azken saioa izango da bihar asteartea, 19:00etan, Basazabal jauregian. Saio horretan Jose Luis Alvarez Enparantza Txillardegiz (Donostia, 1929-2012) ariko da hizketan Karmelo Landa historialaria.
Txillardegi XX. mendeko bigarren aldiko euskal idazle eta intelektual garrantzitsuenetakoa izan zen. Ingeniaria, hizkuntzalaria, soziolinguista, idazlea eta politikaria izan zen. Erbestean hamasei urtetik gora egin zituen eta hirutan egon zen espetxeratuta. ETA mugimenduaren sortzaileetako bat, eta euskara batuaren egile eta eragilea izan zen; euskararen aldeko jarduna Euskal Herriaren eskubide nazionalen aldeko borrokarekin uztartu zuen. Politikari ezkertiarra eta abertzalea izan zen, eta senataria bi alditan. Hainbat liburu eta ehunka artikulu idatzi eta argitaratu zituen.
Abertzaleak zikloko saioak
Abenduaren 18an egin zuten Abertzaleak hitzaldi zikloko lehenengo saioa, eta ordukoan, Aita Manuel Larramendiri buruz aritu zen Edurne Alegria itzultzailea. Urtarrilaren 14an, berriz, Sabin Aranari buruzko saioa izan zen, Xabier Irujo historialariaren eskutik. Otsailaren 18an Eli Gallastegi Gudariren inguruko saioa izan zen, Nerea Azurmendi kazetariaren eskutik, eta martxoaren 19an Telesforo Monzoni buruz aritu zen Pako Sudupe idazlea.