Aurtengo Martxoaren 8an ere feminismoz busti nahi dugu Azpeitia. Eta gogora ekarri nahi dugu, lehenik, herri honetan, azken hamarkadetan zehar lan handia egin duten talde feministen ekarpena.
80. Hamarkadan gure herrian, Euskal Herriko mugimendu feministaren baitan antolatutako emakume talde batek abortatzeko eskubidearen inguruan eta emakumeen sexualitatearen inguruan borroka ugari gauzatu zituen. Abortatzea legez zigortuta zegoen garaietan, asko izan ziren talde honen laguntza jaso zuten emakumeak.
Ondoren 90. hamarkadan, Izarraizpeko sorginak izeneko talde feminista autonomoak askotan astindu zuen herria indarkeria matxistaren kontra, heteroarauaren kontra, nahiz emakumeen bizitzen prekarizazioaren kontra. Proposamen ugari egin zituzten; hala nola, jai eredu feministen aldekoak, publizitate sexistaren salatuketa eta indarkeria matxistarik gabeko guneen aldarrikapena. Udalari, herri feminista bat eraikitzeko ardura hartzeko ere exigitzen hasi zitzaizkion. Aldarrikapen hauek plazaratzeak eztabaida ugari eragin zituen herritarren artean eta eskuin nahiz ezkertiarren kritikak jasan behar izan zituzten, patriarkatuaren aterkia oso zabala dela agerian utziz. Aitzitik, emakume talde honek tinko eutsi zien abiatutako borrokei.
Euskal Herriko Bilgune Feministarekin harremanean, herriko talde propioa ere etorri zen beranduago. Izarraizpeko sorginen lanari jarraipena eman zion talde honek eta Emakumeen Mundu Martxako plataformarekin elkarlanean, emakumeen pobretzea eta emakumeen kontrako indarkeria salatu zituzten hainbat karabana feministetan, baita herri mailan antolatutako hamaika ekimenetan ere. Mundu Martxako plataformak proposatuta, indarkeria matxistagatik eraildako emakumeen* kasuan, herriz-herri elkarretaratzeak egiten hasi ziren, besteak beste.
Bilgune Feministaren ondoren Basandereak taldea dortu zen, herria kolore morez margotzen jarraitzeko gogoz zegoen gazte feministen taldea. Aurrekoen ildotik, patriarkatuaren kontrako borrokan murgilduta aritu ziren lanean, M8-an historikoak izan ziren greba feministak antolatuz eta eraso matxistak salatuz!
Orain feminismoak batu gaituen emakume talde bat Azpeitiko Feministan Sarien antolatu gara, urtetan egindako lanaren aitortza egin nahian batetik eta alor honetan zeregin ugari dagoela jakitun, horiei heltzeko prest, bestetik.
Denak ala denak Euskal Herriko Mugimendu Feministaren parte izanik, belaunaldiz-belaunaldi balio feministak dituen herri bat eraikitzeko lanean aritu gara. Ari gara.
Euskal Herriko mugimendu feministaren jarduna, antikapitalista, antiarrazista, eta antipatriarkala izan da beti eta urteetan egindako lan hori aitortzea ezinbestekoa iruditzen zaigu aurtengo martxoaren 8an ere. Are gehiago faxismoaren gorakada latzaren aurrean gaudela kontuan hartzen badugu. Faxismoari aurre egin diogu feminismotik eta horretan jarraitzeko asmotan gatoz aurten ere.
Izan ere, desberdinkeriek bere horretan diraute, eta sistema zisheteropatriarkal kapitalista kolonial eta arrazistak birfundatzen jarraitzen du. Eskuin muturraren, faxismoaren eta jarrera erreakzionarioen gorakada ikus dezakegu hainbat esparru eta sektoretan; sare sozialetan, prentsan, kalean, diskurtsoetan, proposamen politikoetan... Ez da soilik urrutiko zerbait, eskuinetik datorren hau ez da mugimendu estanko bat. Ezkerreko sektore batzuetan ere ari gara ikusten feminismoarekiko kontrakotasuna edota diskurtso arrazisten gorakada.
Jarrera eta posizionamendu belizistek ere indarra hartu dute azken urteetan, eta horrek zuzenean gure gorputz eta lurraldeen aurkako zapalkuntzak areagotzea dakar. Horren aurrean indarkeriarik gabeko bizitzak izateko eskubidea nahi dugula diogu ozen.
Mugimendu Feministatik urtez-urte egiten ari garen lan eta borrokaren ondorioz, hamaika lorpen eskuratu ditugu, baina ohartzen gara, urrats bat egiten dugun bakoitzean, oldarraldi erreakzionario bat jasotzen dugula bueltan pribilegioak kolokan ikusten dituztenen partetik.
Emakume*, trans eta bolleron zapalkuntza betikotzen duen sistemaren sostengu diren gizonen aldetik. Feminismoa ezkerreko borroken erdigunera ekarri behar dugu, feminismo antiarrazista, antikolonialista, antikapitalista eta antiklasista.
Feminismoa baita eraldaketarako proposamen integralak egiteko ezinbesteko mugimendua. Etengabe zapaltzen gaituen sistema baten kontra aterako gara aurten ere Euskal Herriko kaleetara.
Eta, gure borrokak, hemen eta orain, hiru ardatz ditu:
Lehena indarkeria matxistarena da; emakume* trans eta bollerok jasaten ditugun eraso eta menderakuntza egoerekin amaitu beharra dago. Erasoak, soldata arrakala, egiten dugun ordaindu gabeko lana, kristalezko sabaiak... Indarkeria dira eta sistema betikotzeko ezinbesteko tresnak dira.
Bigarrenik, krisi ekosoziala ekarri nahi dugu mahai gainera. Gaur egun, krisi ekosozial global batean murgilduta gaude: kapitalismoak, patriarkatuak eta kolonialismoak bere fase neoliberalean eragindakoa, sustrai sakonak dituena.
Bizitza akabatzen duen sistema baten aurrean gaude: bai pertsonen bizitzak, bai natura bera. Baliabide naturalak eta lurra bera erabat pribatizatuta daude eta hazkunde amaigabearen logikak, planetaren mugak ez ditu kontuan hartzen. Hemen ere, negozioa eta merkantilizazioa dago beste ezeren gainetik. Gainera, lurren pribatizazioa eta ustiapena ez da ausaz gertatzen. Iparralde globaleko herriek hegoaldekoak kolonizatzen jarraitzeko ezinbesteko tresna da, eta Euskal Herritik ere badugu ardura hori salatzeko eta horren amaiera exijitzeko.
Hirugarrenik egungo sistema arrazista eta koloniala betikotzen dituzten migrazio politikak salatu nahi ditugu. Atzerritartasun legearekin amaitu behar dugula ozen aldarrikatzen jarraitzen dugu. Baina, ez hori bakarrik, urjentziaz salatu behar ditugu migratzaileen kontra ematen ari diren jarrera arrazistak eta segurtasunaren izenean polizia gehiagoren beharra aldarrikatzen dituztenen diskurtsoak, arrazakeria areagotzearen erantzule direnak, besteak beste.
Azkenik, Martxoaren 8 honetan ere, ezin ditugu ahaztu munduan barrena hainbat gatazketan borrokan eta erresistentzian dabiltzan kideak. Hemendik gure babes eta elkartasun osoa; Palestina, Sahara, Kurdistan eta borrokan ari diren herri zapalduetara.
Beraz, har ditzagun kaleak eta oihukatu dezagun ozen nazkatuta gaudela. Segi dezagun aliantzak eraikitzen oldarraldiz beteriko garai hauetan. Elkartu gaitezen, saretu gaitezen. Batu ditzagun indarrak herri eta jendarte feminista bat eraikitzera bidean. Aspaldi ekin genion bide honi eta ez dugu inolako asmorik atzerapausorik emateko.
M8an Azpeitiko Plazan elkartuko gara, egitarau honen baitan:
- 12:00 umeentzako tailerra.
- 12:30 kontzentrazioa.
- 13:00 mokadua