Azpeitiarren erdiek ere ez zuten errenta aitorpena euskaraz egin iaz. 8.493 herritarrek egin zuten errenta aitorpena, eta horietatik %48 izan ziren euskaraz. Azpeitiko Udalak eta UEMAk dei egin dute 2024ko ekitaldiari dagokion errenta aitorpena euskaraz egiteko.
Zaparraiek bat egiten du eskaera horrekin; izan ere, eremu informalean ez ezik, etxeko finantzen eremuan eta erakundeetako izapideetan euskara sustatzea beharrezkoa da. Euskara lagunarteko hizkuntza ez ezik, administrazioko, negozioetako eta politikako hizkuntza ere bada. Bizitzeko balio duen hizkuntza da, bere esparru guztietan. Horregatik, herritarrei dei egiten diegu errenta aitorpena euskaraz egitera. Bakoitzak bere alea jarrita, baietz aurten erdiak baino gehiago izan errenta aitorpena euskaraz egin dugunak!
Oso erraza da, gainera!
- Autolikidazio proposamena:
Jasotako proposamena onartzerakoan, telefonoz zein Internet bidez, euskaraz egin nahi duzula esan, eta aurrerantzean ogasunak agiriak euskaraz bidaliko dizkizu.
- Mekanizatua:
Hitzordua hartzerakoan, adierazi Ogasunarekin harremanak euskaraz izan nahi dituzula. Horrela eskatuz gero, Ogasunarekin harremana euskaraz izan dezakezu, bai aurrez aurre, bai telefonoz zein Internet bidez ere. Behin hitzordura joatean, euskaraz egin nahi duzula esatearekin nahikoa izango da.
- Internet bidez:
Errenta programaren euskarazko bertsioa jaitsi Internetetik eta hobetsitako hizkuntzaren atalean euskara aukeratu.
Aholkularitza zerbitzuren bat aukeratuz gero espresuki adierazi beharko duzu euskaraz egin nahi duzula. Beste eraren batera egiten baduzu ere (finantza erakunderen baten bidez...), euskaraz egiteko eska dezakezu.
Gogoan izan, gure eskubidea da erakundeekiko harremanetan euskara erabiltzea. Eskatu beldurrik gabe!