Danborrada hazten ari da, eta aurten 31. taldea gehitu zaio helduen desfileari. Azpeitiarrek festan parte hartu nahi duten seinale. Herriko jairik parte hartzaileenak dira sansebastianak. Pozgarria da hori, ezta?
Dudarik gabe. Azpeitiko helduen danborrada indar handia hartzen ari da azken urteetan. Aurtengo danborradara beste talde bat gehitu da, eta 31 izango dira, guztira. 1.550 lagun baino gehiagok parte hartuko dute aurten San Sebastian bezperako danborradan, eta ongietorriak izango dira aurrerantzean animatzen diren talde berriak ere.
Herritarrek badute, ordea, kezka nagusi bat: plazan tokirik izango al den. Arazorik ez dela egongo ziurtatzerik bai?
Danborradako beteranoek diotenez, hogei talde zirenean ere plazan ez zen tokirik egoten. Eta, orain, 31 taldera iritsi gara. Ukatzerik ez dago denok sartzeko lekuz larri ibiliko garela. Talde bat gehiago izanda, kabitu kabitzen gara, baina ez da gauza bera plazan zer tokitan jotzea tokatzen zaizun. Aurten, atzeko lau taldeetako zenbait danbor jotzailek Azoka Plaza barruan egon beharko dute, eta han atzean egon edo aurreneko ilaran egon, ez da berdin bizitzen festa. Gero eta danbor jotzaile gehiago egoteak plazan ikusleentzat leku gutxiago izatea ere ekartzen du. Gai hau danborradako bileran aipatu eta eztabaidatu izan da. Momentuz, taldeek Azpeitiko danborrada orain den bezala nahi dute; badakite hasieran edo plazan denbora luzez egon beharko dutela, edota beste urte batean leku ez hain ona tokatuko zaiela.
"Ukatzerik ez dago lekuz larri ibiliko garela plazan denok sartzeko"
Sansebastianak festa herrikoiak izanik, parte hartzea ezin da mugatu. Baina talde gehiagok izena emanez gero, irtenbiderik aurreikusi al du udalak?
Egoera hau planteatu da danborrada batzordean, baita danbor taldeekin egiten diren bileretan ere. Bilera horietan jasotakoaren arabera, danbor taldeek danborrada gaur egun den bezala nahi dute. Aurreko urteetan egin izan dira moldaketak, baina horiek ez ziren aurrera atera. Aurten ikusiko dugu egindako aldaketarekin nola irteten den danborrada, eta sansebastianen ondoren egiten den balorazio bileran aztertuko dugu zer esaten duen jendeak. Bitartean, batzordeak lanean jarraituko du, egoerak aztertzen eta aldaketak eta hobekuntzak planteatzen.
Festaren herrikoitasunaren isla da batzorde berria sortu izana. Zeintzuk dira haren eginkizun nagusiak? Nola egingo du lan batzorde horrek?
Batzordea urtean bizpahiru aldiz elkartuko da: azaroko ohiko bileraren aurretik, danborradaren ondoren eta maiatza aldera. Bertan landuko dira danborradaren inguruko gaiak, eta hobekuntzak edo aldaketak planteatu behar badira, ondo hausnartuta eta landuta eramango dituzte talde guztiek parte hartzen duten bileretara, ondoren han eztabaidatu eta erabakiak har ditzaten.
Finkoa izango da batzordea, edo kideak aldatzen joango dira?
Lehendabiziko batzordea boluntarioekin osatu zen. Talde horretako kideek bi urte egin dituzte, eta aurten, dagoeneko, San Sebastian jaietan parte hartzen duten danbor taldeetako ordezkariak hasi dira batzordera sartzen. Danbor talde bakoitzeko ordezkariek bi urte egingo dituzte batzordean, eta horien txanda igarota, beste hiru taldetako ordezkariak gehituko dira. Batzordea sei taldetako ordezkariz osatuta egongo da. Batzordeak eztabaidatu edo landu ditu zenbait puntu, eta horiek danbor taldeekin egin zen azaroko bileran azaldu zituen, bakoitzak bere taldean adierazi eta hausnartzen joateko.
Aurtengo aldaketa nagusia taldeen ordenan nabarituko da: bosnaka aldatuko dira. Zer lortu nahi izan da horrekin?
Hori izan da danborradako batzordeak landu eta proposatu duen aldaketetako bat. Ikusten zen, taldeen ordena banaka mugitzean, danborrada hasteko garaian edota plazan denbora luzez egon behar izaten zutela partaideek zain. Gauza bera gertatzen zen parrokiako geldialdian. Aldaketa dinamikoagoa izatea lortuko da orain.
Aldiz, banderaren jaitsieran sei taldetik zortzi izatera aldatzea proposatu zen arren, ez da onartu. Baztertu egingo da ideia, edo aurrerago berriro helduko zaio gaiari?
Batzordeak aldaketa hori proposatu zuen, bandera jaitsiera erakargarriagoa izan zedin, baina bozketa eginda, ez zuen aurrera egin proposamenak, boto bategatik. Ondorengo batzordeari iruditzen bazaio proposamen egokia dela, gaia landuta, berriro egin daiteke bozketa.
Umeen egun handia, berriz, San Sebastian eguna izaten da. Herria koloreztatzeaz gain, ederra da irribarre horiek ikustea, ezta?
Pozez eta ilusioz egoten dira herriko haurrak danborradan irteteko, baita haien familiak ere. Arropen probaketatik hasi, entsegu egunak, danborrada... momentu berezi gisa bizi dute dena. Uste dut denok dugula gure txikitako oroitzapenen artean danborradan atera ginen eguna. Horrekin batera, nabarmendu nahiko nuke haurren danborradan ateratzen diren taldeen atzean dagoen boluntario lana.
"Pozez eta ilusioz egoten dira haurrak danborradan irteteko"
Aurtengo karrozak Azpeitiko antzinako lanbideak izango ditu erakusgai. Zer moduz joan da lehiaketaren prozesua?
Aurten lau proiektu aurkeztu dituzte lehiaketara, eta hori oso positiboa da; ikusi da gaia erakargarria izan dela. Ez da erreza izan aukeraketa, denek lan onak aurkeztu dituztelako, baina bat aukeratu behar zen, eta Aitor Expositorena izan da aurten ere irabazlea. Festa batzordeko kideok osatzen dugu epaimahaia, eta irizpide zehatz batzuk kontuan hartuta, puntuaketa sistema bidez egiten da aukeraketa.
Egun gutxi falta dira festarako. Nola bizi dituzu azken egun hauek?
Momentuz dena antolatuta dago, eta ustez kontrolpean dut egoera, baina badakit eguna iristen denean, helduen danborrada hasi arte, oso urduri egongo naizela. Dena ez dago zure esku, eta horrek jartzen nau urduri.
Eta amaitzeko, zer-nolako festak espero dituzu aurten? Herritarrentzat mezurik?
Aurtengo festez denok gozatu ahal izatea espero dut. Denona da festa, eta horren ardura guztiona da. Hori bermatzea espero dut.