Zumaiako, Azpeitiko eta Getariako udalek udaltzainak kontratatzeko lan eskaintza bateratua egingo dutela iragarri zuten otsailaren 19an, eta kudeaketa gomendioa formalizatzeari behin behineko onarpena eman zioten atzo Zumaiako Udaleko ohiko udalbatzarrean. Aurrerantzean, beraz, Zumaiako Udalak izango du hiru herrietako udaltzainen lan eskaintza bateratuaren kudeaketaren ardura. Izan ere, Udal Gobernuaren hitzetan, hiru administrazioek beren hautaketa prozesuak aurrera eramateko eskumena dute, eta behin onarpena emanda, martxoan deialdia zabaltzea aurreikusi dute.
Zumaiako EH Bilduko zinegozien aldeko hamar botorekin eta EAJko ordezkarien kontrako zazpirekin egin du aurrera lan eskaintza bateratuaren proposamenak. EAJko ordezkariak desados agertu ziren lan eskaintza egiteko moduarekin, Azpeitiko otsaileko udalbatzarrean EAJko ordezkariek hartu zuten jarrerari jarraiki.
Jeltzaleen izenean, Iker Mardarasek azaldu zuen udaltzainen lan eskaintzarena "gai politikoa" dela, eta ez duela lan eskariak dituen beharrekin zer ikusirik: "Eusko Legebiltzarrean Polizia Legea aldatzeko gehiengorik lortu ez denez, alkatetza duen herrietan bere polizia eredua inposatu nahi du EH Bilduk". Halaber, Arkautiko ereduari balioa ematen diotela eta hori defendatzen dutela esan zuen Mardarasek. Jeltzalearen hitzetan, Arkautiko akademia "erreferentea" da formazioari eta aukeraketari dagokionez, eta gainera, polizia guztiak "irizpide profesional berberekin" formatzen eta hautatzen ditu. Udal bakoitza bere kabuz aritzea ez da eraginkorra, haren arabera.
Baliabide publikoen erabilera eraginkorra aldarrikatzeko baliatu zuen aukera Mardarasek. Izan ere, udal baliabideen erabilera eraginkorraren kontrakoa da koalizioaren proposamena, haren ustez: "Udalari lana erraztu eta lan karga handia kentzen dio; izan ere, gutxiengo gaiak ondo konpontzera ez da heltzen udala, besteak beste, sorosleen kontratazioetan, Hogarreko tabernako lizitazioan edo kirol zerbitzuen pleguetan". Lan eskaintza "antzua" da, bestalde, EAJren udal taldearen ustez. "Ez du ezarri zaion gertutasunaren helburua betetzen. Edozein aurkeztu daiteke, eta beraz, gertutasun hori bermatu nahi izatea alferrikakoa da", azaldu zuen Mardarasek. Euskara maila ere izan zuen hizketagai: hizkuntza eskakizunak igo beharrean lan egitera datozenei "denbora eta aukera" emateko eskatu zuten jeltzaleek, "hori baita euskarari egin ahal zaion ekarpena, euskara muga bihurtu gabe".
Mardarasek, bestalde, polizia plaza batentzat Zumaia ez dela leku erakargarria esan zuen; izan ere, haren hitzetan, hiriburuak eta herri handiak dira lehen aukera titulazioa lortzen dutenentzat. Arkautiko ereduak herrien arteko "ikuspegi bateratua eta lankidetza" sustatzen dituela ere gaineratu zuen, eta halako lan eskaintza propioek, herrien artean "oztopoak eta mugak" ezartzen dituela erantsi.