Trikiti doinuen eta euskal abestien laguntzarekin aurkeztu zuten atzo Azpeitian Euskaraldirako prestatu duten hamaikakoa. Emakume nahiz gizon, gazte zein heldu, jatorri bateko edo besteko, 11 lagunen banakako aurkezpenak egin zituen Aitziber Besga Euskaraldiaren Azpeitiko koordinatzaileak Sanagustin kulturgunean.
Hain zuzen ere, honako herritar hauek dira aurtengo Euskaraldiko Azpeitiko hamaikakoa osatu dutenak: Ekain Ibarguren (pailazoa eta malabarista), Eider Bereziartua (marketin eta komunikazio teknikaria nahiz kirolaria), Xanti Agirrezabala (aktorea), Maider Egiguren (liburutegiko langilea), Aimen Mazud (helduen eskolako eta euskaltegiko ikaslea), Haritz Arakistain (Elikaguneko langilea), Carmen Olano (Gaztelekuko gizarte hezitzailea), Marian Agirre (irakasle ohia), Mila Perez (igerilekuko harrerako langilea), Ander Alberdi (igerilekuko mantenuko langilea) eta Ramata Diaw (helduen eskolako eta euskaltegiko ikaslea).
Euskaraldiaren Azpeitiko koordinatzaileak zehaztu zuenez, beste hainbat hamaikako ere osatu zitzaketen herrian, baina eratu dutena "ederra" dela eta gustura daudela adierazi zuen. Halaber, hamaikakoa osatu duten kideetako bakoitzak Euskaraldian zergatik parte hartuko duen eta zer roletan ariko den ere zehaztu zuen hark. Izan ere, batzuk ahobizi eta besteak belarriprest izango dira euskararen erabilera areagotzea xede duen ariketa sozialak irauten duen egunetan.
Gainera, herritarrei maiatzaren 15etik 25era egingo den egitasmoan izena emateko deia egin zien; izan ere, zabalik dago norbanakoek izena emateko epea ere. Herritarrek Internet bidez nahiz batzordeko kideek jartzen dituzten mahaietan izango dute horretarako aukera. Gainera, Azpeitiko Udalak dagoeneko eman du izena Euskaraldian, eta herritarrek Euskaraldia-Hikan ere parte hartu ahal izango dute.
Arkupea deituriko agertokian bildu ziren Euskaraldiko ordezkariak atzokoan, eta denek elkarrekin bertsoak kantatuta bukatu zuten ekitaldia. Dena den, gero, mokadutxoaz gozatzeko parada ere izan zuten kulturgunean elkartutako lagunek.
Hona hemen atzoko ekitaldiko argazki bilduma: