Atzo, astelehena, zabaldu zuen Uztarria Komunikazio Taldeak, Azpeitiko Kultur Mahaiarekin eta Azpeitiko Argazki Elkartearekin elkarlanean antolatutako Irudhitzen lehiaketara testuak aurkezteko epea. Izan ere, behin argazki lehiaketako epaia jakinda, aukeratutako argazki horiei hitzak jartzeko unea da orain.
Epaimahaiak nabarmentzen duen testuak 150 euroko saria jasoko du. Pertsona bakoitzak argazki lehiaketan aukeratutako bost irudiri jarri ahal dizkio hitzak, eta gehienez 150 hitzeko testuak aurkeztu daitezke.
Honakoak dira testu lehiaketaren oinarriak:
- Pertsona bakoitzak gehienez bost irudiri jarri ahal dizkio hitzak.
- Norberak erabakitzen du zertaz idatzi. Urtaroaz, argazkiaz, argazkiak sentiarazten dionaz...
- Gehienez 150 hitzeko testuak izan behar dute.
- Aipatu egin behar da zein argazkiri jarri zaizkion hitzak.
- Abenduaren 8a izango da testuak bidaltzeko azken eguna, honako helbidera: lehiaketakuztarria@gmail.com.
Testuen lehiaketako epaimahaia Xabier Gantzarainek, Alaitz Olaizolak eta Miren Gorrotxategik osatuko dute.
Epaimahaiek aukeratutako argazkiekin eta testuekin 2018ko egutegia kaleratuko du Uztarria Komunikazio Taldeak.