Azpeitiarekin anaituta dago Hazparneko herria (Lapurdi) eta igande honetan berri pozgarria gertatuko da han, orduan inauguratuko dutelako Ezkia Ikastolaren eraikin berria. Hasiera batean urtearen hasieran ziren zabaltzekoak (Baite Euskara Elkartearen aldizkariko 9. zenbakian argitaratu genuen bezala), baina azkenean datorren igandean, apirilaren 27an, egingo da inaugurazio ekitaldia.
Ikastolan bertan 12:00etan izango da ekitaldia, eta Azpeititik bertara joateko autobusa izango da Ikasberri Azpeitiko Ikastolak antolatuta. Autobusa 09:30ean Azpeitiko anbulategi aurretik abiatuko da, eta Azpeitira garaiz bueltatzeko asmoa da. Baite Euskara Elkarteko ordezkariak ere joango dira igandean Hazparnera.