Eusko Jaurlaritzak eta Eudelek (EAEko udalen erakundea) deituta, elkarretaratzea egin dute gaur (astelehena) eguerdian Azpeitian ere, Frantziako larunbateko atentatua salatzeko.
Plazan izan da elkarretaratzea, 12:00etan hasita. Pankartarik gabe egin dute, isilean. 40 bat lagun bildu dira; haien artean zeuden EAJren Azpeitiko zinegotzi batzuk.
Ustezko etakideek guardia zibil bat hil zuten larunbatean Capbreton-en. Baionatik (Lapurdi) 25 kilometrora dago herri hura. Raul Centeno (24 urte) da hildakoa, eta Fernando Trapero (23 urte) guardia zibila oso larri dago. Tiroak bota zizkieten.