Gaur (abenduak 3, astelehena) Euskararen eta Ikastolaren Eguna ospatu da batean eta bestean. Azpeitian, herriko bi ikastetxek egun osoko egitaraua prestatua zuten euskararen eta ikastolaren egunari gorazarre egiteko eta ekimen ugari burutu dute, haurrak protagonista hartuta.
Ikasberri Azpeitiko Ikastolan goizean goiz igorri den pregoiak eman dio hasiera egunari. Haur Hezkuntzako haurrekin hasi eta Batxilergoko gazteenganaino, ikasle guztiek hartu dute parte euskararen eta ikastolaren aldeko ekimenetan. Mari Domingiri harrera, ipuin kontaketak, Argitxori eskainitako marrazkiak, lehiaketak eta filmak ikusi dituzte, besteak beste, ikastolan. Goizeko ekimenen ondoren, bazkaria izan da ikastolako aretoan eta horren ostean, Batxilergoko bigarren mailako ikasleek eskainitako showa ikusi ahal izan da gimnasioan.
Azpeitiko Ikastola Karmelo Etxegarain eta Urola Ikastolan ere ez dute ahantzi Xabier Deunaren eguna eta euskararen eta ikastolaren aldeko ekimen ugari egin dute: irratsaio berezia, ipuin kontaketak, marrazkiak, abestiak, jolasak, futbola, saskibaloia, sokatira, pilota partiduak, mihiluze lehiaketa, eta mus txapelketa izan dira, besteak beste, bi ikastetxeetan burutu dituzten ekimenak.