Joan den astean IƱaki Errazkin alkateak egindako adierazpenei erantzunez eta "herrian sortu den zalantzazko egoeraren aurrean" Azpeitiko EAJk hainbat adierazpen egin ditu. Alderdi horren ustez, "Etxebeltz-Izarrako etxebizitzen zozketa egiteko baldintza legal guztiak beteta daude". EAJk dio Etxebeltz-Izarran egingo dituzten 154 Babes Ofizialeko Etxebizitzen zozketak udan egina behar zuela eta gainontzeko 54 etxebizitzen zozketak dagoeneko prestatzen hasita.
EAJren arabera, "ez dago exekuzio proiektuaren onarpenaren zain egon beharrik. Bederatzi hilabete igaro dira zerrendak itxi zituztenetik eta zerrendan daudenek eremu horretan etxerik izango duten ala ez lehenbailehen jakin behar dute". Ildo beretik, "obrak atzeratzen" ari direla salatu dute. "Aspaldi hartu beharreko erabakiak oraindik ez dira hartu eta obrak atzeratzen ari dira. Urte erdia pasatu da udal gobernua hartu zutenetik, zeren zain daude?".
Industria-guneen garapena
Bestalde, Larre eta Larrin industria-guneak garatzeko "beharrezkoa" uste du EAJk apirilean onartu ziren Hirigintza Arauak Gipuzkoako Aldizkari Ofizialean behingoz argitaratzea. Horrez gain, dagozkien Plan Partzialak eta Hiritartze Proiektuak ere lehenbailehen onartzea "ezinbestekotzat" jo ditu. "Poligono horiek lehenbailehen prestatzea beharrezkoa da. Ez da bakarrik kanpotik etor daitezkeen inbertsioentzako, baizik eta baita bertako enpresek dituzten beharrei bertan erantzuteko ere, kanpora joan ez daitezen".