Lagun Onak Mendi Bazkuneko mendizaleak Izarraitzen egin dute azken ibilaldia. Martxoaren 16an Izarraizko bira egin zuten, "eguraldi paregabearekin". Mendizaleen esanetan, "ibilbide guztia marra hori-zuriei jarraituz egin genuen. Herriko plazatik irten eta hilerritik pasatuz Takolora lehenengo; ohikoa ez den bezala, beheraka egin eta Otsoko baserritik Urretara igo ginen ondoren, handik Kostiteko putzura helduz".
Azpeitiko lurretatik Azkoitikoetara pasatu ziren; Pikua aldetik Aitzara eta handik Otarrerantz, "bide gorritik igoera polit bat eginez". Hamaiketakoa Attola Zaharren egin eta Zestoara abiatu ziren ondoren, Goltzibar aldetik jaitsita, "Ondarbaso aldetik Haitzbakarren azpitik". Ibiliaren ibiliaz, Bentaberritik, Arraio aldetik, berriro ere Azpeitiko hilerri aldera iritsi ziren, abiapuntura.
"Ia hogei kilometroko ibilbide zoragarria osatu genuen, Izarraitzi bira emanez. Baserri piloa ezagutu eta ia asfaltorik zapaldu gabe ibilbidea egiteko aukera dago, bost ordu eta erdi inguruan". Izarraitzek eskaintzen duen beste aukera bat.