Azpeitiak eta Donostiak jokatuko dute Gipuzkoako Herriarteko Pilota Txapelketako finala, igandean, 10:30ean, Donostiako Atano III. a pilotalekuan. Azpeitiak finalerdietan Atauni aurre hartu (5-1 irabazita) eta finalerako txartela lortu du.
Indartsu daude Ilunpe Pilota Elkarteko pilotariak, finalerdietan lan ona egin dute Ataunen kontra eta finalera pasatzea lortu dute, beste behin. Azpeitian Frontoi Txikin 2-1 irabazi zuten Ataunen kontra. Joan den larunbatean, berriz, Goierrin 0-3 egin zuten; haiek uste baino emaitza hobea eginez.
Kadeteetan, Azpeitiko Etxaniz eta Aizpuruk 15-22 irabazi zuten Mikel eta Ibai Arratibelen kontra (Azpetian 9-22 egin zuten). Jubeniletan izan zen borroka gehien, partida ikusgarria jokatu zuten, azkenean Ilunpeko Otamendik eta Murgiondok irabazi zuten 21-22 Jon Arratibel eta Albisuren aurka. Jurgi LarraƱagak eta Josu Uzkudunek azpeitiarren garaipena borobildu egin zuten, 5-22 irabaziz Zubizarreta eta Goikoetxeari.
Finalerako txartelak Frontoi Txikin bihartik aurrera
Donostiako Atano III.a pilotalekuan jokatuko den finalerako txartelak Ilunpe Pilota Elkarteak Frontoi Txikian duen bulegoan egongo dira salgai bihartik aurrera, 18:00etatik 20:00etara bitartean. Beheko harmailetarako sarrerek 12 euro balio dute eta goikoek, berriz, 6 euro. Ilunpetik jakinarazi dutenez, autobuserako izen-ematea ere bertan egingo da.