Uda garaian ez da festarik falta izaten, eta Erlo telebistak Urola Kostako herrietako jaien jarraipena egingo du. "Azpeitian hilaren 30ean San Inazio festei hasiera emango dien txupinazioa botako dute, eta guk saio berezia egingo dugu zuzenean udaletxetik", Iban Bengoetxea Erloko programazio arduradunak. Horrez gain, Zarauzko Kale Antzerki Topaketen berri ere emango dute. Gainontzean, haurrentzako marrazki bizidunak eta dokumental sorta izango dira ikusgai.
Udan Erlo telebistako programazioa arindu eta erritmo lasaiagoan ariko dira lanean. "Uztaila eta abuztuan telebista gutxiago ikusi ohi da, eta langileok ere oporrak hartuko ditugunez, hainbat saio errepikatuko ditugu", adierazi du Bengoetxeak. Albistegiak ere arinago landuko dituzte, baina Urola Kostan gertatzen den guztiaren berri emango dute.