Jose Tomas, Julian Lopez El Juli, Miguel Angel Perera, Cayetano Rivera eta beste toreatzaile ugarik abisua eman diote Eusko Jaurlaritzari: honek lehengo astean onartu zuen zezenketen araudi berrituaren hainbat puntu aldatzen ez baditu, haiek ez dute Arabako, Bizkaiko eta Gipuzkoako zezen-plazetan parte hartuko. Besteak beste, beraz, Azpeitikoan, saninazioetan.
Euren jardunerako "ezinbesteko" diren aldaketak eskatu dituzte toreatzaileen hiru sindikatu nagusiek: Taurak, Union Nacional de Picadores y Banderilleros Españoles-ek, eta Asociacion Sindical de Mozos de Espadas y Puntilleros-ek. Eskumenak murriztu dizkietela uste dute.
Jaurlaritzaren araudiko puntu batzuk:
- Zezenentzako eztena hiru milimetro gutxitu behar da, eta toreatzaileak hemendik aurrera ezingo du mugatu zezena zaldira zenbat aldiz sartzen den.
- Zezenketako presidenteak toreatzaileari agindu ahal izango dio azterketa medikua egiteko, eta erabaki ahal izango du honek toreatzen segi dezakeen edo ez.
- Zezenketa batean toreatzaile batek ezin badu aritu, beste biak eskuz esku toreatzera behartuta egongo dira. Hauek kasu horretan arlo ekonomikoa berriro negoziatzeko bermerik ez dute edukiko.
- Hamasei urtez beherako lagunek ezingo dute zezenketetara heldurik gabe joan hemendik aurrera.
- Zezen bat aurrez toreatua izan den susmoa badago eta hura plazatik erretiratu behar bada, presidentearen iritziak baino ez du balioko.
- Zezenen adar puntek ukiturik behar badute, ez dituzte toreatzaileak zertan deitu horretarako.
- Apoderatuek ezingo dute kailejoian egon.