Inazio Uria Mendizabalaren hil kapera arratsaldeko zazpietan irekiko dute jendearentzako, Azpeitiko beilategian. Gorpua dagoeneko ekarri dute Donostiatik, eta goizeko bederatzietan hildakoaren senideentzat eta agintzarientzat zabaldu dute tanatorioa. Komunikabide ugari bildu da atarian.
Altuna y Uriako enpresaria zen Inazio Uria, eta ETAk atzo (asteazkena) hil egin zuen, tiroz, Loiolan.
Bihar, ostirala, egingo diote hileta elizkizuna, 19:30ean, Soreasuko Sebastian parrokian. Juan Maria Uriarte Donostiako gotzainak emango du meza, eta hiletaren ostean hilketa salatzeko manifestazioa egingo dute Azpeitian bertan, Confebaskek, Adegik, Eusko Jaurlaritzak, Gipuzkoako Foru Aldundiak eta Eudelek deituta.
Gaur goizeko hamar eta erdietan elkarretaratzea egingo dute Altuna y Uriako lankideek, ELAk antolatuta. Langile batzordeak bat egin du deialdiarekin. Eguerdian, berriz, udaletxe atarian protesta bilkura egingo da.