Mireia Epelde Azpeitiko txirrindulariak Menorcako (Herrialde Katalanak) emakumezkoen Challenge lasterketako 3. etapa irabazi zuen atzo, igandea.
Menorcakoa UCI eliteko kategoriako lasterketa da, eta atzo irabazitako etapa 91,8 kilometrokoa izan zen. Epelderen taldeko Ariadna Tudelek irabazi du lasterketa.
Epelde "oso gustura" dago lortutako emaitzarekin. "Fisikoki ondo sentitzen nintzen, baina ez genuen espero horrelako emaitza onik. Lasterketa hasierako helburua lidergoa mantentzea zen, baina azkeneko 20 kilometroetan lidergoa mantentzeaz gain etapa irabazteko aukera zegoela ikusi genuen eta aurrera egin nuen".