Enparan kalean festak izango dituzte igandean. 10:00etan ekingo diote jaiari suziriak botata eta txistularien kalejirarekin. Ondoren, 12:00etan, herri meza izango dute, Frantziskanetako elizan. Mezatik irtendakoan, hamaiketakoa egingo dute Basazabal Elkartean. 14:00etan, berriz, lagunarteko bazkaria egingo dute Baigerako jatetxean.
Bi laguni omenaldia
Bazkalondoan, 80 urte bete dituzten Bixente Lizaso eta Angelita Zabaleta Enparan kaletarrei omenaldia egin eta opariak banatuko dizkiete. Baina festa ez dute horrekin bukatuko, iluntzera bitartean bertsolariek eta trikitilariek alaituko baitute giroa. Jokin Uranga eta Beñat Lizaso bertsolariak ariko dira Enparan kalean.
Erretz-txapelketa Eliz kalean
Eliz kaleko auzotarrak datorren ostegunetik aurrera murgilduko dira jaietan. Hala ere, jaietako lehen ekitaldia gaurko, ostirala, antolatu dute. 16:00etan XXI. Erretz-txapelketa egingo dute Mendizale Elkartean.