Azpeitiko Areto Futbola A-k -talde nagusiak- norgehiagoka erabakiorra jokatuko du bihar, larunbata, Durangon. Euskal Ligarako promozioaren barruan, Bizkaiko eta Arabako azpitxapeldunekin jokatzen ari diren ligaxkako lehenengo postua esku-eskura dute azpeitiarrek, joan den astean Gasteizko Udapari irabazi ostean.
Bihar Durangoko Kurutziaga taldearen kontra irabazi edo berdindu ezkero, ligaxkako lehenengo postua ziurtatuko dute azpeitiarrek, durangarrek eta gasteiztarrek elkarren kontra jokatutako neurketa berdinketarekin bukatu zelako. Biharko partida Landako kiroldegian jokatuko dute, 18:30ean hasita.
Promozio honen txapeldunak datorren denboraldian Euskal Ligan jokatzeko postua erabat ziurtatua ez duen arren, Azpeitiko AF-k ez du hutsik egin nahi, hauxe baitu mailaz igotzeko azken aukera bakarrenetakoa.