Ta3 Azpeitiko Zine Klubak ostiral honetan emango die aurtengo emanaldiei hasiera, euskal zinemako ale batekin: Itsasoaren alaba dokumentala botako du, 21:30etik aurrera, Betharram aretoan.
Lanaz hitz egitera etorriko dira Josu Martinez filmako zuzendaria eta Haize Goikoetxea protagonista.
Emanaldia doan izango da, eta Zine Klubak dokumentala ikustera joateko dei egin die herritarrei.
Sinopsia. Errefuxiatu bikote baten alaba da Haize Goikoetxea, eta bi urte bete gabe zituela bere aita hil zuen GALek Lapurdin, 1984an: Mikel Goikoetxea Txapela. Aitaren oroitzapenik txikiena ez badu ere, 25 urte geroago galdezka hasiko da Haize, aita eta garai hartako egoera nolakoak ziren jakingo du pixkanaka, eta mundu eta sentsazio ezberdinak nahastuko zaizkio. Memoriaren berreskurapenerako ariketa da dokumentala.
Fitxa teknikoa. Zuzendaria: Josu Martinez. Gidoia: Josu Martinez. Argazkia: Hibai Castro. Iraupena: 52 minutu.
Itsasoaren alaba aurtengo Donostiako Zinemaldian eman dute.