Olazko amabirjinaren irudi txiki bat eta plaka bat jarriko dituzte Loiolan Inazio Uria zenaren omenez, haren familiaren ekimenez. Datorren abenduaren 3an beteko da ETAk Altuna y Uriako enpresaburua hil zueneko lehen urteurrena, eta egun horretan inauguratuko dute oroitarria, hilketa izan zen tokian.
Oroitarria herri-lurretan kokatuko denez, Udalak baimendu behar du. Eta hala dira egitekoak bihar, azaroko ohiko osoko bilkuran. Udalean ordezkaritza duten indar politiko guztiek -EAJ, Hautetsi Independentistak, EA eta Aralar- aldeko iritzia agertu dute, Efe albiste agentziak aurreratu duenez.
Inazio Uriaren senitarteko eta lagunak hilero-hilero elkartu izan dira, hilaren 3an, hura hil zuten tokian, atzo bezala. Datorren abenduaren 3tik aurrera elkarretaratzeekin jarraitu ala ez, ez dute oraindik erabaki.
Azkeneko albistea (azaroak 5, 21:00). Hartu du erabakia Udalak, aho batez. Udalak Inazio Uriaren omenezko monolitoa jartzeko erabakia hartu du udalbatzarrean, aho batez hartu ere, udal talde denek egin dutelako alde.