Joseba Otaegi zizurkildarrak irabazi zuen atzo, igandea, Alex Txikon lemoarraren aurka jokatu zuen apustua, Azpeitiko zezen plazan. Atzo eguerdian ziren jokatzekoak, baina haizea tarteko, arratsaldeko 17:00etan hasi zen apustua. Joseba Otaegi zizurkildarrak ordubete eta 22 minutu behar izan zuen garaipena lortzeko.
Jokalari bakoitzak 25 altxaldi egin zituen 100 kiloko zilindroarekin. Ondoren, hamalau kana-erdiko moztu behar izan zituzten eta amaitzeko, zazpi kilometro egin zituzten korrikan. Otaegik aizkoran atera zion aldea Txikoni. Otaegik aizkorako proba amaitu zuenean, Txikoni hiru kana-erdiko falta zitzaizkion korrikan hasteko. Irabazleak 7.000 euro irabazi zituen.
Lehengo urtean, martxoaren 3an, beste apustu bat jokatu zuen Alex Txikonek Azpeitiko zezen-plazan. Orduan, Joxe Felix Zubizarreta azpeitiarrarekin lehiatu zen aizkoran eta etxekoa atera zen garaile. Joseba Otaegik ere ezagutzen du Azpeitiko zezen-plaza: iazko maiatzean Josu Aizpuru Errekalde-rekin neurtu zituen indarrak, eta Otaegik irabazi zuen.