Pazko Astean, apirilaren 6 eta 10 bitartean, XI. Gazte Astea antolatu du Azpeitiko Udaleko Gazteria Sailak. Hori iragarriko duen irudia aukeratzeko kartel lehiaketa jarri zuten martxan otsailean, eta dagoeneko badu irabazlea; Eider Valverde. DBH 3ko ikaslea da Valverde eta beraz, herriko dendetan gastatzeko 80 euroko diru saria jasoko du.
Pazko Asterako ekimenak
Udaleko Gazteria Sailak eta Zapo Txoko gaztelekuak, urtero bezala, gaztetxoentzat hainbat ekimen antolatu dituzte Pazko Asterako. Gazte Astea apirilaren 6tik 9ra egingo dute, eta lau egun horietan ekintza ugari egiteko aukera egongo da.
Gazteriatik antolatutako programetan parte hartzeko izena emate epea zabaldu dute. HH5, LH1, LH2, LH3, LH4, LH5 eta LH6-ko gaztetxoek Iturri Txiki eta Txiki Txoko ludoteketan eman beharko dute izena martxoaren 18a baino lehen. Aldiz, 12 eta 17 urte bitarteko haurrek Zapo Txokon egin beharko dute izen ematea martxoaren 27rako.
Antolatzaileek adierazi dutenez, Zapo Txokoko nahiz ludoteketako ekintzak ordaindu egin behar dira.
Zapo Txokoko ekintzak
Zapo Txokoko ekintzak apirilaren 6tik 9ra izango dira, 10:00etatik 13:00etara. Egun osoko irteera, berriz, 10:00etatik 15:00etara egingo dute. Ekintza bakoitza solte ordaindu behar da, eta hauek dira prezioak: Futbito txapelketan parte hartzeko, talde bakoitzak 3 euro ordaindu beharko ditu. Paintball egiteko irteerara joateko 15 ordaindu behar dira eta rock lantegian parte hartzeko, 3 euro. Masaje ikastaroa, berriz, hiru euroren truke eskainiko dute.
Ludoteketan ere ekintzak
Iturri Txiki eta Txiki Txoko ludoteketan ere hainbat ekitaldi izango dira apirilaren 6tik 9ra bitartean. Ludotekako bazkideek 12 euro ordaindu behar dituzte eta gainontzekoek 15 euro. Besteak beste, hauek izango dira lau egunetako ekintzak: jolasak, eskulanak, altxorraren bila, fimo tailerra... Ekintzak goizeko 10:00etatik 13:00etara izango dira. Egun osoko irteera, aldiz, 10:00etatik 17:30etara egingo da.
Egitaraua: XI Gazte Astea
**HH5LH1LH2LH3**
Apirilak 6, asteartea: Jolasak
Apirilak 7, asteazkena: Eskulana: puzzlea
Apirilak 8, osteguna: Txiki Parkera egun pasa
Apirilak 9, ostirala: Altxorraren bila
**LH4LH5LH6**
Apirilak 6, asteartea: Fimo tailerra
Apirilak 7, asteazkena: Bizikleta irteera Urrestillara
Apirilak 8, osteguna: Baigorrira egun pasa
Apirilak 9, ostirala: Altxorraren bila
12-17 urteko gaztetxoak
Apirilak 6, asteartea: Futbito txapelketa
Apirilak 7, asteazkena: Paintball irteera
Apirilak 8, osteguna: Rock lan tegia edo Masaje ikastaroa
Apirilak 9, ostirala: Patata tortila lehiaketa