Erniarraitz Bertsozale Elkartearen hamargarren urteurrena dela-eta, gaur arratsaldean bertsolaritzaren inguruko mahai-ingurua izango da Enparan Dorretxean, 19:30etik aurrera.
Ekitaldian Erniarritzen X. urteurreneko bideoa eskainiko dute, Azpeitiko, Azkoitiko eta Errezilgo bertsozaleak biltzen dituen elkartearen ibilbidea irudietan laburbiltzeko.
Herritarrekin elkarrizketa
Urola bailarako bertsolaritzari buruz ariko dira. Hiru hizlari izango dira bertan. Lehenik eta behin, Joxin Iturriotz, Urola bailarako bertsolaritzaren aztertzailea, ezagutzen den historian bertsolaritzak utzi dituen arrastoei buruz ariko da.
Ondoren, Imanol Lazkano bertsolariak 1960 eta 2000 urte arteko bertsolaritza biziaz jardungo du. Azkenik, Jokin Uranga bertsolaria bertsolaritzaren gaurko errealitateaz eta etorkizunera begira bertsozaleek dituzten erronkei buruz ariko da.
Mahai-ingurua izanik, herritarrekin elkarrizketa sortzea da helburua, hiru hizlariek proposatutako gaien gainean hitz egitea eta eztabaidatzea. Moderatzaile lanetan Josu Azpillaga ariko da.