Herriko bi talde Gipuzkoako Eskolarteko Saskibaloi Txapelketako finalerako sailkatu dira. Iraurgi Ikastetxeko alebin mailako mutilek eta Azpeitiko Ikastola Karmelo Etxegaraiko alebin mailako neskek egin dute balentria.
Aipatu bi taldeek aurreko bi asteburuetan jokatu dituzte finalaurdenak eta finalerdiak eta, kanporaketetan gailendu ondoren, finala jokatzeko hitzordua dute bihar. Tolosako Usabal Kiroldegian jokatuko dituzte Gipuzkoako Eskolarteko Txapelketako finalak, 10:00etan hasita.
Karmelo Etxegaraiko neskek Donostiako Mary Ward ikastetxeko taldearen kontra jokatuko dute finala. Iraurgiko mutilek, berriz, Donostiako Mundaiz Ikastetxeko taldea izango dute aurrez aurre finalean.