Ekainean onartu du Azpeitiko Udalak aurtengo -2010eko- aurrekontua. Iaz ere garai berean onartu zuen. Joan den urtean ez bezala, ordea, aho batez onartu dute aurtengoa -atzo gauean-; hau da, EAJk, ezker abertzaleak, EAk eta Aralarrek. 2009an azken hiruren botoekin jo zuten ontzat. Udal gobernuan EAJ dago.
Udalaren aurrekontu propioa 19.997.826,61 eurokoa izango da. Iaz garai honetan onartu ziren kontuekin alderatuz gero, hasierako aurrekontu harekiko igoera %8,36koa da; 2009ko bukaerako aurrekontua kontuan hartuz gero, ordea, jaitsiera %3,26koa da. Julian Eizmendi alkatearen hitzetan, "doikuntza gogorra iazko urtean" egin zuen Udalak kontuetan: 2009ko aurrekontuek %9,36ko jaitsiera izan zuten 2008ko hasierako aurrekontuekin alderatuta, eta bukaerakoekin alderatuta, berriz, jaitsiera askoz nabarmenagoa izan zen: %18,76a.
Eizmendik azaldu duenez, "saiakera egin da gastuak kontrolatzen, ezinbestekoa baita bizi dugun koiunturan aurrezki garbia mantentzeko eta inbertsioak egiten jarraitzeko". 2010erako aurrikusitakoan, aurrezkiarekin eta diru laguntzekin "inbertsioetan gora" egiten dela esan du alkateak, eta mailegu berririk ez dutela aurrikusten. Gizartekintza alorrean, ia gastu guztiak mantendu edo igo egin dituztela nabarmendu du alkateak.
Udalaren aurrekontu propioarekin batera, Euskara Patronatuarena (646.746,49 euro), Kirol Patronatuarena (990.921,42 euro) eta Azpeitia Lantzen SArena (6.566.056 euro) ere onartu zituzten atzoko udalbatzarrean. Guztien baturak ematen du 2010eko udal aurrekontu propioa: 27.330.682,61 euro. Euskara Patronatuaren aurrekontua %7,86 murriztu dute, eta Kirol Patronatuarena %1,68 igo.
Oposizioa ekarpenekin bat
Iñaki Errazkin hautetsi independentistak nabarmendu duenez, aurten ere oposizioko alderdiak (hautetsi independentistak, EA eta Aralar) Udal aurrekontuen inguruko oinarriari egin beharreko ekarpenak adosteko gai izan dira. "Horiek adostu eta aurrekontuetan txertatu ditugu", esan du.
EAko Manuel Unanuek Udal aurrekontuak aho batez onartu izana nabarmendu du. "Aho batez onartu ditugu, eta gero Udaletik kanpo blokeoaz hitz egiten da. Non dago blokeo hori?", galdetu du. Aralarreko Juan Karlos Arellanoren esanetan, "aurtengoak pazientzia handiko Udal aurrekontuak izan dira".
Bi liberatu
Oposizioak (hautetsi independentistak, EA eta Aralar) proposatuta Udal Gobernuak bi liberatu izatea onartu du Udalbatzak. Baina soldatekin ados ez eta oposizioa abstenitu egin zen gai horri dagokionean. Hala ere, onartu egin zen EAJkoen aldeko botoekin.
Hala, Julian Eizmendi alkatea (EAJ) eta Iñaki Etxezarreta (EAJ) Zerbitzu Orokorretako eta Baserrietako zinegotzia izango dira Udaleko bi liberatuak. Alkateak 65.873, 22 euroko urteko ordainsari gordina izango du, eta hilero 3.235,20 euroko ordainsaria jasoko du. Etxezarretak, berriz, 38.762,50 euroko urteko ordainsaria izango du, eta hilekoa 2.093 eurokoa. Ordainsaria erabakitzeko irizpidea aurreko lantokikoa izatea izan dela, eta Eudelen irizpideen azpitik jasoko dutela esan du Eizmendik.
2010eko udal aurrekontua
| AURREKONTU OROKORRA ETA ENTITATE BAKOITZARENA | |
|---|---|
| Aurrekontu orokorra | 27.330.683 |
| Udala | 19.997.827 |
| Euskara Patronatua | 646.746 |
| Kirol Patronatua | 990.921 |
| Azpeitia Lantzen SA | 6.566.056 |
| UDALEKO SAILEN AURREKONTUA | |
|---|---|
| Ogasuna eta kontuak | 1.536.954 |
| Hirigintza eta ingurumena | 3.951.300 |
| Hezkuntza eta Gazteria | 707.595 |
| Kultura eta Euskara | 965.696 |
| Kirolak | 732.621 |
| Gizartekintza | 1.013.264 |
| Langileria eta antolakuntza | 5.725.202 |
| Festak | 581.360 |
| Zerbitzu Orokorrak eta baserriak | 4.197.552 |
| Alkatetza | 306.000 |
| Industria, Merkataritza eta Turismoa | 172.781 |
| Parekidetasuna | 107.500 |
- 2010eko inbertsioak. Aurten Udalak 9.338.110 euroko inbertsioa egingo du.
- Aurrekontuan sartutako ekarpenak.
- Nazio eraikuntzarako, 55.000 euro.
- Parekidetasuneko hainbat gastutarako, 15.000 euro.
- Sanjuandegin auzo lokala alokatzeko, 6.000 euro.
- Tabernetan zarata neurgailuak jartzeko laguntzetarako, 20.000 euro.
- Goi karguen soldata eta gastu sozialetarako, 100.000 euro.
- Aurrekontuan aurreikusitako inbertsioak.
- Sanjuandegin hirigintza lanak egiteko, 175.000 euro.
- Bidegorria egiteko, 300.000 euro.
- Beste urbanizazio batzuk (Azillerri, Soreasu...), 345.000 euro.
- Udal eraikinetan lanak egiteko, 200.000 euro.
- Oktogonoan igogailua jartzeko, 80.000 euro.
- Soreasuko kulturgunerako, 1.350.000 euro.
- Udal Liburutegia handitzeko, 156.545 euro.
- Musika Eskolarako, 97.456 euro.
- Obra eta zerbitzuetarako ibilgailuak erosteko, 110.000 euro.
- Baserri bideetarako, 190.000 euro.
- Gerakinekin eta diru laguntzen bidez finantzatzeko asmoa duten egitasmoak.
- Betharrametan, 250.000 euro.
- Udal Liburutegian, aurrekoaz gain 118.000 euro gehiago.
- Nuarben frontoia egiteko, 175.000 euro.
- Ur hornidura sarerako, 100.000 euro.
- Berdelariko (Perdillegiko) pilotalekua estaltzeko, 156.000 euro.
- Udalak lokala erosteko, 300.000 euro.
- Enparangai eta Loiola (Xanadu aurrean) oinezkoentzako egokitzeko, 191.000 eta 241.000 euro.
- Diru laguntzarik egonez gero aztertzeko gelditu diren hainbat inbertsio.
- Done Jakue kalean hiritartzeko lanak, 590.000 euro.
- Igerilekuan berritze lanak, 860.000 euro.
- Goenan kamioientzako eta karabanentzako aparkalekuak egitea, 400.000 euro.