Juan Antxieta Musika Eskolak bihar, ekainak 23, agurtuko du 2009-2010 ikasturtea, Izarraitz pilotalekuan egingo duten ikasturte amaierako jaialdiarekin. Urtero bezala, musika eskolako ikasleek ikasturtean zehar ikasitakoaren emaitza jendaurrean plazaratzeko aukera izango dute, irakasleen laguntzarekin eta gidaritzapean.
Ikasleen kontzertua 19:30ean hasiko da. Hamabi emanalditan banatutako ekitaldia izango da aurtengoa. Txalaparta soinuekin ekingo diote jaialdiari, eta hortik aurrera eszenatokitik igaroko dira hastapen mailako ikasleak eta baletekoak -hauek hirutan-, saxo taldea, metal taldea, teklatuak, kitarra taldea, perkusio taldea, orkestra, banda gaztea eta abesbatza.