Saninazioak gertu, Haurren Egunarekin festa giroa hedatzen hasi da herrian.
Itsasiko txistulariek eta Banda Gaztearen kalejirarekin hasi zen herenegun Umeen Euskal Festa. Ondoren, haurrek osatutako Udalbatza Txikiak kalejira egin zuen udaletxetik parrokiara bitartean.
Meza entzun eta berriro udaletxeko arkupetara joan zen Udalbatza osatu zuten taldea. Horrekin batera, erraldoien kalejira hasi zen. Aurten, iaz baino bi talde gutxiagok hartu dute parte bertan; hau da, hamabi herritatik etorritako konpartsak ibili ziren alde zaharreko kaleetan barrena.
Erraldoien urteroko lehia
Kalejira bukatuta, erraldoien konprtsa guztiak herriko plazan bildu ziren. Han, dantzari txikiek dantza saioa egin eta ondoren Erraldoien Dantza Txapelketa hasi zen.
Aurrena banaka jardun zuten eta, ondoren, taldeka. Banakakoetan, Bergarak irabazi zuen norgehiagoka eta, ondorioz, 300 euroko saria eskuratu zuten bergararrek. Puntu erdiko aldeari esker nagusitu zen Bergara. Taldekakoetan, berriz, Iruñeko Txantrea auzoko erraldoiak izan ziren dantzan onenak. Txantreako taldeak 600 euroko saria jaso zuten aurtengo txapelketan.
Erraldoien Dantza Txapelketako epaimahaia honako hauek osatu zuten: Azpeitiko Dantza Suelto eskolako Luis Alberdik, Azpeitiko Argazki Elkarteko Joxerra Larrañagak, Zarauzko konpartsako kide Itziar Irastorzak eta Azpeitiko Udaleko zinegotzi Onintza Etxeberriak.
Itzal bila
Azkeneko urteetan bezala, aurten ere bero handia egin zuen umeen egunean.
Horregatik, herriko plazan jende asko itzalaren bila ibili zen igandean. Arratsaldean, haurrentzako jolasak izan ziren bai plazan, bai Olazko Andre Mariaren plazan, eta herriko txikienek eta gaztetxoek ez zuten Udalak jarritako aukera galdu nahi izan.