Loiolako santutegiko teilatuaren zati bat konpontzeko lanak abian jarriko ditu laster Gipuzkoako Foru Aldundiak. Hain zuzen ere, 200.000 euro bideratuko ditu Diputazioak konponketa lan horiek burutzeko. Lanak Reformas y Contratas de Gipuzkoa SL enpresari esleitu dizkio eta lau hilabetez luzatuko dira.
Foru Aldundiko arduradunek azaldu dutenez, basilikaren atariaren eta kupula inguratzen duen girolaren estalkia dira konponduko dituztenak. Horrez gain, kaltetuta edo hondatuta dauden beste zenbait teila-sail ere konponduko dituzte.
Loiolako santutegiaren teilatuak 7.700 metro karratu ditu guztira, basilikaren kupula eta dorreak kontuan hartu gabe. Orain dela hogeita bi urte inguru, 1989an, santutegiaren jabe den Aldundiak guztiz eraberritu zuen santutegiaren estalkia. Diputaziokoek esan dutenez, oro har santutegiaren teilatua "oso ondo" dago.