Azken urteetan ohitura bihurtu den bezala, trenez iritsi dira Azpeitira Meltxor, Gaspar eta Baltasar, Errege Magoak. Agindutako ordua -17:30ak- baino pixka bat beranduago, baina hutsik egin gabe iritsi da hirukotea.
Dozenaka txiki eta heldu zain izan dituzte Trenaren Museoan. Umeak, gurasoak, aiton-amonak... guztiak Erregeak gertutik ikusteko zain. Eta ez ikusi bakarrik: Hollywoodeko edota futboleko izar handienen pare, argazkitarako behin eta berriz gelditu behar izan dira hiru Erregeak, Azpeitira ekarri dituen trenetik jaitsi eta kanpoan zain zituzten autoetarako bidean. Aurrez, trenetik bertatik, gozoki poltsa ugari hustu dituzte, kabalgatan gehiago banatzeko zain.
Gauean hala eskatu dutenen etxeetan opariak txintxo-txintxo utziko dituztela aginduta alde egin dute, kalez kaleko ibilbideari ekin aurretik atseden hartzera.