Iaz 1.600 lagun bildu ziren Inox dantzalekuan, I. Autokros diskofestan. Eta aurten "arrakasta errepikatu" nahi dute antolatzaileek. Bihar, larunbata, 17:00etatik 21:00etara, autozaleen gune bilakatuko da dantzalekua. Bertan, Barrenola-Azpiazu kart-cross taldea aurkeztearekin bat, berrikuntzaz betetako festa antolatu dute taldeak eta haien babesleek.
Aurten festa dantzaleku barruan eta atarian egingo dute, "erretzaileekin pentsatuz". Hala adierazi du Igor Agirrebeña Barrenola pilotuak. Barruan kartkrossen erakusketa egongo da, beste gauzaren artean. Kanpoan, berriz, bi simulagailu egongo dira, baita haur nahiz helduentzako kart-ak ere. KTM, Husquqarna, Alfer eta beste hainbat markatako motoen postua ipiniko dute, eta Hummer motako auto handi bat ere izango da bertan, musika ekipo handi batekin.
Sarrera doan izango da, eta hurbiltzen direnen artean hiru sari zozkatuko dituzte: lehena, Lagunak auto eskolak emango duen gida-baimena; bigarren, Rneumatikoak-ekoek emango dituzten bi gurpil, eta hirugarrenik, DTMk oparituko duen olio eta filtro aldaketa. Taldearen babesleak erakustearekin batera (1 Formulako babeslea, Red Bull, tartean), jendeak autoen inguruan arratsalde alaia igarotzea izango da helburua