Pirritx, Porrotx eta Marimotots hirukotea Pupu eta Lore umeekin etorriko dira Azpeitira, hilaren 19an. Ongi etorri Pupu eta Lore ikuskizuna, Kilometroak 2011ren alde antolatu dute Uztaro haurreskolak eta Azpeitiko Ikastola Ikasberrik eta Izarraitz pilotalekuan izango da. Bi emanaldi eskainiko dituzte; 16:00etan eta 18:30ean, eta bi sarrerek kolore desberdina izango dute.
Gaur, astelehena, jarri dituzte salgai pailazoen ikuskizunerako sarrerak. Sei euro balio dute sarrerek eta pertsonako bat erosi beharko da. Gainera, segurtasun neurriak tarteko, ikusle kopurua mugatua izango da.
Sarrerak honako lekuetan erosi ahal dira:
Azpeitian Kilometroak 2011ko dendan, Udal Kiroldegiko tabernan, Uztaro haurreskolan, Lasa gozotegian eta Pastorkua, Ametsa eta Eguzkitza tabernetan. Errezilgo dendan ere erosteko aukera izango da. Azkoitian, berriz, Yalai gozotegian eta Zestoan, Mairi estankoan.