Korrika 17 gurean dugu jada. Arratsaldeko hiruak aldera Matxinbentara iritsi, handik Nuarbe eta gero Urrestilla zeharkatuta, Landetatik bariantea hartu eta Zestoara bidean utzi dute azpeitiarrek. Baina, ez luzarorako, laster bueltan izango baita euskararen aldeko lasterketa: 17:49ak aldera espero da Eskuztara iristea eta, orduan bai, Azpeitiko erdigunea zeharkatuko du. Bazkalondoan lasterketak zeraman abiadura mantenduz gero, baliteke zertxo bat lehenago ere iristea, Urrestillatik esandako ordua baino lehen pasatu da eta.
Txikien festa
Herria Korrika nagusia noiz iritsiko zain dagoen bitartean, gaztetxoenak hasiak dira festaz gozatzen. Ehundaka ikaslek hartu dute parte Korrika Txikian, eta ordu honetan oraindik festa giroan dabiltza plazan.