Datorren asteburuan, hilaren 17an eta 18an, Saskibaloiko Euskal Kopako finalaurrekoak eta finala jokatuko dira Azpeitiko kiroldegian.
Zapatuan, hilaren 17an, Aurteneche Maquinaria Araba/Alaba Zornotza Saskibaloi Taldearen kontra ariko da, 16:30etik aurrera. Bigarren partida 18:45ean hasiko da eta Lan Mobel ISBk Càfes Aitonaren kontra jokatuko du.
Bi partida horietako garaileek jokatuko dute igandeko finala, eta 12:00etan hasiko da neurketa kiroldegian.
Aloña Mendi, Easo Pastas Arruabarrena eta UPV Alava taldeek ere hartu dute parte txapelketan, baina ez dute azken fasera sailkatzerik lortu.
Iaz Iraurgi garaile
Iaz ere hartu zuen parte Lan Mobel ISBk Euskal Kopan, eta baita irabazi ere. Azpeitiko taldea 77 eta 46 nagusitu zen Donostiako Càfes Aitona Askatuak taldearen kontra.