Datorren igandean, irailak 25, Zelatunera igoko dira Lagun Onak Mendi Bazkunakoak, iraileko azken igandeko erromeriarekin urteroko hitzordua berrituz.
Aurten, Erdoizta-Zelatun ibilaldia egingo dute Azpeitiko mendizale elkartekoek. Gaztetxoei zuzendutako egunpasa izango da igandekoa. 09:00etan aterako da plaza Nagusitik mendizaleak Erdoiztara eramago dituen autobusa. Handik igoko dira oinez Zelatunera. Bertan egunaz gozatu ondoren, arratsaldean Trintxerara jaitsiko dira, eta hantxe hartuko dute Azpeitira bueltan ekarriko dituen autobusa, 18:00etan.
Izen-ematea
Osteguna, irailak 22, izango da irteerarako izena emateko azken eguna. Mendizale elkartean, tabernan edo lagunonak@euskalnet.net helbide elektronikoan eman behar da izena. Lagun Onak MBko bazkideek 4 euro ordaindu beharko dute, eta 6 euro gainontzekoek.