Bukatzen ari da soziedadeen arteko I. mus txapelketako lehen fasea; egunotan ari dira jokatzen bigarren asteburua. Atzo (osteguna) Antxieta Urrestillako soziedadean hogei lagun aritu ziren jokoan, eta Bixente Unanue Uherte-k eta Joxe Antonio Lasa Zamaye-k osatutako bikotea izan zen txapeldun —arkumea, ardo kaxa eta gazta irabazi zituzten—.
Bigarren Iñaki Berasategi Erreiru-Lander Garate bikotea geratu zen eta, irabazleekin haiekin batera, txapelketako azken fasera sailkatu dira. Abenduaren 10ean (larunbata) izango da fase finala Sanagustin kulturgunean, 64 bikoterekin (15:00).
Txapelketako lehen faseko datozen saioak
- Gaur (ostirala). Oilo Soro, Irrintzi, Nahi genduena (Nuarbe), Ilunpe, Zokoa eta Orkatzen.
- Bihar (larunbata). Harkaitza, Izarraitz Txoko, Loiolatxo eta Inpernun.
- Etzi (igandea). Arauntzan.
Azpeitiko Kultur Mahaiak antolatu du txapelketa, soziedadeen arteko hartu-emanak gehiago sustatzeko asmoz. Bide batez, Kultur Mahaiak diru iturriak lortu nahi ditu txapelketarekin (Mahaiak aurten 19.000 euroko aurrekontua du).