Etorkinen integrazioa ikastetxeetan lelo hartuta, Loiola Berrikuntza-Ezagutza Gunea sarearen baitan, Azkoitiko eta Azpeitiko udaletako eta ikastetxeetako ordezkariak elkarlanean ari dira. Azaroaren 29an, udaletako eta ikastetxeetako 28 ordezkari bildu ziren; besteak beste, Azpeitiko
Ikastola Ikasberriko, Azpeitiko Ikastola Karmelo Etxegaraiko, Azpeitiko Iraurgi ikastetxeko, Azkoitiko Floreaga ikastetxeko, Azkoitia- Azpeitia Urola Ikastola BHIko, Azkoitiko Ikastola Xabier
Munibeko Lehen Hezkuntzako eta DBHko ordezkariak.
Lan bileraren helburua etorkinen integrazioaren gaiaz elkarrengandik gehiago ikasi eta esperientziak trukatzea da. Batzarrean, Euskal Herriko Unibertsitateko irakasle Felix Etxeberriak hartu zuen parte. Ondoren, datorren urtera begira arazo amankomun batzuk identifikatzeko asmoarekin talde dinamika egin zuten. Parte hartu zutenak gustura gelditu zirela azaldu dute Loiola Berrikuntzatik.