1512-2012 Nafarroa Bizirik plataformak martxa nazionala antolatu du datorren zapaturako (ekainak 16), Nafarroaren konkistaren 500. urteurrenaren harira. Autobusak antolatu dituzte zapaturako, eta izena ohiko tokietan eman behar da. 08:15ean abiatuko da autobusa Azpeititik, eta 19:00etan izango da itzulera Iruñeatik.
Lehenengo, 10:00etan, Getzetik Noaingo batailako monumentura martxa egingo dute. 13:30ean bazkaria izango da, eta 17:00etan hasiko da Euskal Herriko Martxa Nazionala Iruñean, autobus geltokitik abiatuta.
Udalak ere bat
Azpeitiko Udalak maiatzeko udalbatzarrean Urolaren Napar Zuzterrak taldeak aurkeztutako adierazpena onartu zuen eta Nafarroa Bizirik Egunari atxikimendua agertu zion, Bilduren aldeko bozkekin. Aldiz, Hamaikabat eta EAJ abstenitu egin ziren. Guztira, Euskal Herriko 90 herrik eman diote babesa ekimenari.