Urriaren 20an (zapatua) eta 26an (ostirala) banatuko dituzte Azpeitian erosketetarako ontzi berrerabilgarri edo tupper-ak, Ontziratu zaitez kanpainaren baitan. Kutxa Ekoguneak, Urola Erdiko Mankomunitateak eta bailarako udalek hondakin gutxiago sortzeko asmoarekin bultzatu duten ekimena da Ontziratu zaitez. Azkoitian aurkeztu zuten irailaren 28an eta udalerri horretan banatu zituzten aurreneko ontzi berrerabilgarriak.
Azpeitiari iritsi zaio orain txanda. Hain zuzen ere, aipatutako bi egunetan guztira 3.300 ontzi banatuko dituzte herritarren artean. Urriaren 20an goizez (10:00etatik 13:00etara) eta 26an arratsaldez (17:00etatik 20:00etara), plaza Nagusian jarriko dute ontziak banatzeko gunea. Arraindegiak eta harategiak dira kanpainan parte hartuko duten saltokiak. Azpeitian, honako hauek: VL, Fernando Villegas, Kontxi eta Karmiña arraindegiak, Barrenetxe, Zabala, Odriozola, Juan Cruz (Urrestillan), San Sebastian, Matxin, Beloki, Intxausti eta Mohamed Azaoum harategiak eta Eroski Center supermerkatua. Saltoki horiek jada ari dira bezeroen artean ontziak jasotzeko txartelak banatzen. Hala ere, ontziak banatuko dituzten egunetan postura joaten direnek bertan jaso ahal izango dute ontzia.
EkoBira azoka
Zapatuan, urriaren 20an, EkoBira azokarekin bat egingo du ontzi erabilgarrien banaketak. Kutxa Ekoguneak bultzaturiko azoka da EkoBira, kontsumo jasangarria bultzatzeko helburuarekin. 2012koa bigarren edizioa du, baina Azpeitian lehen aldiz izango da.
Plaza Nagusian jarriko dute azoka zapatuan, 10:30etik 14:30era eta 16:30etik 19:30era.