Zapatuan, urriaren 20an, iritsiko da aurreneko aldiz Azpeitira EkoBira azoka. Kontsumo jasangarria sustatzea da Kutxa Ekoguneak bultzaturiko azoka ibiltari horren helburua eta, bertan, ekoizle ekologikoak, eskulangileak, material birziklatuekin lan egiten dutenak eta energia berriztagarrien sektoreko enpresek hartuko dute parte.
Besteak beste, gordailu-salmenta postua ere ezarriko dute, bigarren eskuko produktuak saldu edo erosi nahi duten herritarrei zuzenduta. Postu horretan beren bigarren eskuko gauzak saldu nahi dituzten herritarrek aurrez izena eman behar dute, www.ekogunea.net webgunean.
EkoBira azokaren gaineko informazio osoa ere webgune horretan aurki daiteke.
Ontzi berrerabilgarriak
EkoBira azokarekin bat eginda, Ontziratu zaitez kanpainaren tupper edo erosketetarako ontzi berrerabilgarriak jasotzeko lehen zita izango dute herritarrek zapatu goizean, 10:00etatik 13:00etara. Urriaren 26an ere banatuko dituzte ontziak, 17:00etatik 20:00etara.