2012a Aizkorrin bukatu eta 2013a Erlon hasi ostean, Santa Barbaratik Irimora ibilaldia egingo dute hilaren 13an, igandea, Lagun Onak Mendi Bazkunak antolatuta. Egun erdiko ibilaldia izango da, eta 08:30ean abiatuko da autobusa plazatik. Behin autobusean sartuta, Urretxuko Santa Barbara auzora joango dira, eta handik Irimo aldera egingo dute ibilaldia. 12:30ean Erleen Museoa ikusteko aukera izango dute bertaratzen direnek, eta museoa ikusi ostean itzuliko dira herrira. Lagun Onakekoek azaldu dutenez, "eguraldiaren arabera ibilaldia aldatu egin daiteke".
Bihar, osteguna, izango da izena emateko azken eguna. Mendi bazkunaren tabernan edo webgunean egin daiteke inskripzioa. Bazkideek bi euro eta gainontzekoek lau euro ordaindu beharko dute.