SOS Amazonia goiburuarekin, Amazonas ibaiaren arroako herri indigenei laguntzea helburu duen ekimena da bihar, zapatua, Soreasuko San Sebastian parrokian emango duten kontzertua.
Juan Luis Anasagasti tenore bilbotarra eta Bilbon bizi den Akari Kamitaka piano-jotzaile japoniarrak emango dute kontzertua, 19:15ean hasita. Bertan, euskal kantu tradizionalak (Iru damatxo, Aurtxoa seaskan, Boga boga...), euskal egileen opera eta zartzuela pasarteak (El caserio, La tabernera del puerto, Mendi mendiyan) eta italiar musika (O sole mio, Santa Lucia, Funiculi funicula, Torna a Sorrento...) entzuteko aukera izango da.
Amazoniaren aldeko kontzertua aurreko urteetan ere egin izan dute parrokian.