Khamar Saharar herriaren aldeko Azpeitiko taldea udari begira lanean ari da aurten ere. Bi hilabetez, uztailean eta abuztuan, saharar haurrak etxean hartuko dituzten familien zerrendaren osaketa nahikoa aurreratua daukate dagoeneko, baina oraindik zabalik dute izena eman nahi duten familia gehiagorentzako epea.
Eusko Jaurlaritzak bultzatutako Oporrak bakean programaren barruan etorriko dira aurten ere Saharako umeak, besteak beste, Azpeitira. Tindufeko (Aljeria) errefuxiatuen kanpalekuetan bizi diren haurrak dira. Udan, paraje haietan bizi-baldintzak lehenaz gain asko zailtzen zaizkie, 50 graduko tenperaturekin. Tenperatura horiek umeengan sor ditzaketen ondorioak saihestea da, hain zuzen ere, saharar haurrak Euskal Herrira ekartzearen arrazoi nagusienetakoa.
Programan parte hartu eta datorren udan etxean saharar haur bat hartu nahi duenak martxoaren 15a baino lehen eman behar du izena. Horretarako, eta behar duten informazio guztia eskuratzeko, 699964662 telefonora deitu behar du.