Euskaltzaindiak eta BBK-k elkarlanean, urtero banatzen dituzten Resurreccion Maria Azkue Literatur Saria jaso dute Urola ikastolako Iñaki Arizmendi eta Nerea Urrestilla ikasleek. Arizmendik narrazio alorreko A mailan (11 eta 14 urte bitartekoen maila), bigarren saria jaso du Altxa porru! ipuinari esker. Urrestillak, berriz, epai-mahaiaren aipamen berezia jaso du, Maialenen egunerokoa lanarekin.
Aurten, orotara, 167 lan aurkeztu dira. Horietatik 6 Arabatik bidali dituzte; 57 Bizkaitik; 94 Gipuzkoatik; eta 10 Nafarroatik. Aurtengo epaimahaikideak hauek izan dira: Yolanda Arrieta, Igone Etxebarria eta Antton Irusta A mailan, eta B mailan, Joseba Butron, Jabier Kaltzakorta eta Mayi Iza.
Joan den asteazkenean, martxoaren 13an, egin zuten sari banaketa Euskaltzaindiak Bilbon duen egoitzan eta han izan ziren bi azpeitiar ikasleak (argazkian).