Dani Estrada zarauztarra eta Gorka Elustondo beasaindarra dira bihar, asteartea, Azpeitira etorriko diren Realeko bi futbolariak.
Realak eta Kutxak -Donostiako klubaren babesleetako bat- iragarria zuten talde txuri-urdineko bi jokalari Azpeitian izango zirela biharko egunez, bi erakundeek elkarlanean antolatzen ari diren ekitaldien barruan. Gaur, astelehena, jakinarazi dute bi jokalariak Estrada eta Elustondo izango direla.
Haiekin hitzordua 17:30ean izango da, Kutxaren Goikokaleko bulegoan. Autografoak sinatu eta joaten diren zaleekin argazkiak aterako dituzte Realeko jokalariek.