Sagardoa, gazta edota ganadua bezala, pilota ere Santio egunaren ezinbesteko osagaia da Azpeitian. Bihar, 10:30ean hasita, Ilunpe Pilota Elkartearen udaberriko XXIX. Txapelketaren (Cesar Valverderen oroimenezkoa) finalak jokatuko dira Frontoi Txikian.
Aurten lau txapel jarriko dituzte jokoan. Benjamin aurrekoetan, buruz buruko final bakarrean, Arellanok eta Errastik neurtuko dituzte indarrak. Benjaminetan, Egigurenek eta Elizegik Alonso eta Zigaran izango dituzte aurrean. Alebinetan, Unanue eta Segurola Alberdi eta Aranbarriren kontra ariko dira. Eta, infantiletan, Egigurenek eta Arangurenek Iriarteren eta Expositoren aurka jokatuko dute.
Azken finala bukatu bezain laster, sari banaketa ekitaldiarekin bukatuko da Santio eguneko gaztetxoen pilota festa.